سورة هُود · ئایەت ١٧
أَفَمَن كَانَ عَلَىٰ بَیِّنَةࣲ مِّن رَّبِّهِۦ وَیَتۡلُوهُ شَاهِدࣱ مِّنۡهُ وَمِن قَبۡلِهِۦ كِتَـٰبُ مُوسَىٰۤ إِمَامࣰا وَرَحۡمَةًۚ أُو۟لَـٰۤئِكَ یُؤۡمِنُونَ بِهِۦۚ وَمَن یَكۡفُرۡ بِهِۦ مِنَ ٱلۡأَحۡزَابِ فَٱلنَّارُ مَوۡعِدُهُۥۚ فَلَا تَكُ فِی مِرۡیَةࣲ مِّنۡهُۚ إِنَّهُ ٱلۡحَقُّ مِن رَّبِّكَ وَلَـٰكِنَّ أَكۡثَرَ ٱلنَّاسِ لَا یُؤۡمِنُونَ ﴿١٧﴾
تەفسیرا ساناهی
ئه‌رێ ڤێجا هه‌چییێ ل سه‌ر ڕێكه‌كا ڕوهن وئاشكه‌را بت ژ خودايێ خۆ، د باوه‌رییا خۆ دا و د وى تشتى ژى دا يێ ئه‌و ب وێ وه‌حییێ بۆ گازى دكه‌ت يا خودێ ئه‌ڤ هێجه‌تا ئاشكه‌را تێدا ئيناى، وده‌ليله‌كێ دى د دويڤ دا ژ وى ب خۆ بێت ببته شاهد، كو جبريله يان موحه‌ممه‌ده -سلاڤ لێ بن-، وبه‌رى قورئانێ ده‌ليله‌كێ دى ژى ل سه‌ر وێ چــه‌نــدێ هــه‌بت، كو ته‌وراته -ئه‌و كيتابا بۆ مووساى هاتى دا ببته پێشبه‌ر ودلۆڤانى بۆ وان يێن باوه‌رییێ پێ دئينن-، ئه‌رێ ئه‌وێ ل سه‌ر ڤێ ڕێكا ئاشكه‌را بت چێتره يان ژى ئه‌وێ خه‌ما وى هه‌ما ئه‌ڤ دنيايا به‌روه‌خت بت؟ ئه‌وێن هه باوه‌رییێ ب ڤێ قورئانێ دئينن، وكارى پێ دكه‌ن، وهه‌چییێ كوفرێ ب ڤێ قورئانێ بكه‌ت ژ وان يێن دژى پێغه‌مبه‌رى -سلاڤ لێ بن- خۆ داينه ئێك، جزايێ وى ئاگره، ئه‌و هه‌ر دێ چتێ، ڤێجا تو -ئه‌ى پێغه‌مبه‌ر- د مه‌سه‌لا قورئانێ دا وكو ئه‌و ژ نك خودێیه قه‌ت نه‌كه‌ڤه گومانێ پشتى هێجه‌ت وده‌ليل ل سه‌ر وێ چه‌ندێ هاتين، وتو بزانه كو ئه‌ڤ دينه حه‌قییه ژ خودايێ ته، به‌لێ پترییا مرۆڤان باوه‌ر ناكه‌ن، وكارى ب وى تشتى ناكه‌ن یێ فه‌رمان پێ لێ هاتییه‌كرن، وئه‌ڤه گۆتنه‌كا گشتییه بۆ ئوممه‌تا موحه‌ممه‌دى سلاڤ لێ بن.